파이란

ဘ၀မှာ ဘာမှဖြစ်ဖြစ်မြောက်မြောက်မရှိလို့ လူမိုက်လုပ်ပေမဲ့ လူမိုက်လုပ်တာတောင် ဖြစ်ဖြစ်မြောက်မြောက်ရှိမနေတဲ့ လူတစ်ယောက်နဲ့ တရုတ်ပြည်မှာ အားကိုးစရာ ဘာမှမရှိတော့လို့ ကိုရီးယားရောက်လာရာက ကိုရီးယားက သူ့အဒေါ်တွေပါ အမေရိကားပြောင်းသွားကြလို့ တစ်ကိုယ်တည်းဖြစ်နေတဲ့ မိန်းကလေးတစ်ယောက်ရဲ့ ဇာတ်လမ်းပေါ့။ သူတို့၂ယောက်ဟာ မျက်နှာချင်းဆိုင် တစ်ခါမှ မတွေ့ဖူးကြဘူး။ တစ်ယောက်ကိုတစ်ယောက်တော့ တစ်ကြိမ်တစ်ခါစီပဲ တွေ့ဖူးကြတယ်။ သူတို့ကြားက အဆက်အစပ်ဆိုလို့ လည်စည်းနီလေးတစ်ထည်၊ စာလေးနှစ်စောင်၊ တရုတ်မလေး ကိုရီးယားမှာ နေလို့ရအောင် အေဂျင်စီက သူတို့ကို အကြင်လင်မယားအဖြစ် မှတ်ပုံတင်ပေးထားတဲ့ စာချုပ်ထဲက လက်ထပ်ခြင်းတစ်ခု ဒါပဲရှိတယ်။ ဒါပေမဲ့ ဒီလိုဘ၀နာနာမှာပဲ သူတို့ရဲ့ အချစ်တွေကတော့ မြင်နေကြုံနေကျ အချစ်ဇာတ်လမ်းတွေထက်တောင် ခမ်းနားနေခဲ့တယ်။ တစ်ခါမှ မျက်လုံးချင်းမဆုံဖူး၊ ဘာမှလည်း မဆက်စပ်တဲ့ လူ၂ယောက်ရဲ့ အချစ်တွေ ဘာကြောင့် ဒီလောက်ခမ်းနားနေခဲ့လဲ မေးလာရင် အရှုံးတွေကြောင့်လို့ပဲ ဖြေရမှာပါပဲ။ ဒီရုပ်ရှင်ဟာ အရှုံးတွေကနေ ပိုချစ်တတ်လာစေခဲ့တဲ့အကြောင်းပေါ့။